Opera-მ კრიპტობრაუზერის iOS ვერსია გამოუშვა

Opera-მ თავისი კრიპტობრაუზერის iOS ვერსია გამოუშვა. ამ დრომდე ის Windows, Mac და Android მოწყობილობებზე იყო ხელმისაწვდომი.

ცნობისთვის, აღნიშნული ბრაუზერი შექმნილია Web3-ზე წვდომისთვის და მასში non-custodial კრიპტოსაფულეა ჩაშენებული. Opera-ის თქმით, იგი შემუშავებულია როგორც მათთვის, ვინც უკვე კარგად იცნობს კრიპტოვალუტებს, ასევე იმ ადამიანებისთვის, ვინც ამ მიმართულებაში ახალბედაა.

,,Web3-ის მიმართ ინტერესი უფრო და უფრო იზრდება. Opera Crypto Browser Project კი სწორედ Web3-ის მომხმარებლების გამოცდილების გასამარტივებლად შეიქმნა. ჩვენ მივიჩნევთ, რომ Web3-ის გამოყენება ადვილი უნდა იყოს, რათა მან თავის სრულ პოტენციალს მიაღწიოს’’, – აცხადებს იორგენ არნესენი.

ბრაუზერში ჩაშენებულ კრიპტოსაფულეს აქვს Ethereum-ის, Polygon-ისა და Celo-ის მხარდაჭერა, ასევე მეტი ბლოკჩეინ ეკოსისტემის ინტეგრირება იგეგმება. აღნიშნული საფულე მომხმარებლებს ტრადიციული ვალუტით გამოყენებით კრიპტოვალუტის შეძენის, ასევე მხარდაჭერილი ტოკენების გადაცვლის, გაგზავნისა და მიღების საშუალებას აძლევს. ის ასევე უზრუნველყოფს პირდაპირ წვდომას დეცენტრალიზებულ ბირჟებსა თუ აპლიკაციებზე და Web3-ზე დაფუძნებულ NFT-ებზე. ამის გარდა, მომხმარებლებს უკვე არსებული, Ethereum Virtual Machine-სთან თავსებადი კრიპტოსაფულეების Opera-ს საფულესთან ინტეგრირება შეუძლიათ.

ბრაუზერს ასევე აქვს Crypto Corner, რომელიც აერთიანებს კრიპტოსიახლეებს, ღონისძიებებს, პოდკასტებსა და სხვადასხვა საინტერესო ინფორმაციას.

აღსანიშნია, რომ მას გააჩნია უსაფრთხოების ისეთი ფუნქციები, როგორებიცაა ad blocker, tracker blocker, pop-up blocker და Cookie Dialogue Blocker.