,,დიდი კომპანიის შესაქმნელად საჭირო პირველი ნაბიჯი ზრდა არაა’’ – სემ ალტმანი
,,ჩვენ მუდმივად ვეუბნებით სტარტაპებს, რომ სწრაფად უნდა გაიზარდონ. ეს მართალიცაა და ძალიან კარგი რჩევაა… ისინი ზრდით განისაზღვრებიან, მაგრამ დიდი კომპანიის შესაქმნელად საჭირო პირველი ნაბიჯი ზრდა არ არის’’, – ამბობს სემ ალტმანი და აღნიშნავს, რომ სილიკონ ველის სტარტაპებში ჩამოყალიბებულმა მოდამ ზრდაზე კონცენტრირების საკითხი არაჯანსაღ უკიდურესობამდე მიიყვანა – ,,სტარტაპები ყოველკვირეული ზრდის მიზანს სახავენ მანამ, სანამ რეალურად გაიაზრებენ, თუ რისი შექმნა სურთ’’. ალტმანის თქმით, ამ საკითხზე ყურადღების ეპიცენტრის ზედმეტად ადრე გადატანა სტარტაპებს აზიანებს და სანამ დამფუძნებლები ზრდაზე იფიქრებენ, ჯერ უნდა გაარკვიონ, თუ რას და რატომ აკეთებენ; შემდეგ კი პროდუქტი შექმნან – ,,სტარტაპი, რომელიც ზრდის მიზანს ნაადრევად ისახავს, საბოლოოდ ქმნის გაურკვეველ პროდუქტს, რომელიც ზოგიერთ მომხმარებელს მხოლოდ ასე თუ ისე მოსწონს’’.
ზემოთ ხსენებული უბრალოდ მოწონება კი, ცხადია, არ არის საკმარისი. მომხმარებელს პროდუქტი უნდა უყვარდეს, თანაც იმდენად, რომ მის შესახებ სხვებს ესაუბროს – ,,ვფიქრობ, ყველაზე შესაბამისი საწყისი მეტრიკა არის კითხვა – ,,უყვარს თუ არა ზოგიერთ მომხმარებელს ჩვენი პროდუქტი იმდენად, რომ მისი გამოყენება სხვა ადამიანებს სპონტანურად ურჩიოს?’’. სანამ შეკითხვაზე პასუხი ,,დიახ’’ არ იქნება, ზრდის ნაცვლად, სწორედ ამ საკითხზე უნდა ფოკუსირდნენ დამფუძნებლები’’. ალტმანი აღნიშნავს, რომ თუ ადამიანებს პროდუქტი უყვართ, სტარტაპის გაზრდა ბევრად მარტივი ხდება – ,,მომხმარებლების შენარჩუნება უფრო ადვილი იქნება და ისინი სხვებს თქვენი პროდუქტის შესახებ მოუყვებიან. მომხმარებლები, ფაქტობრივად, უფასო მარკეტინგის წყარო ხდებიან. გიგანტური კომპანიის ჩამოყალიბების შანსი კი გაცილებით მაღალია მაშინ, როდესაც თქვენს პროდუქტზე ინფორმაცია ზეპირსიტყვიერად ვრცელდება’’. აღნიშნული ნებისმიერი ტიპის სტარტაპს ეხება – მთავარია, პოტენციურმა მომხმარებელმა დაინახოს, რომ უკვე არსებული მომხმარებლები კმაყოფილნი არიან, ხოლო მიწოდებული პროდუქტი ან მომსახურება – შესანიშნავი.
სრულიად საწინააღმდეგო შედეგს იღებენ დამფუძნებლები მაშინ, როდესაც მომხმარებელს პროდუქტი არ უყვარს – ,,შეიძლება ადრეული მომხმარებლები გყავდეთ, მაგრამ მოგვიანებით სტარტაპის ზრდა გართულდება. ზრდის შესანარჩუნებლად, არაორგანულ საშუალებებზე – მარკეტინგზე, რეკლამაზე ან პიარზე – დაყრდნობა მოგიწევთ. თანაც, რაც უფრო დიდია სტარტაპი, მით უფრო ძნელდება მიმართულების კურსის გასწორება. მას შემდეგ, რაც კომპანია დიდ საბრძოლო ხომალდად იქცევა, მოხერხებულად მოძრაობა და საჭირო საფუძვლიანი ცვლილებების სწრაფად განხორციელება რთული ხდება’’.
ალტმანი აღნიშნავს, რომ თუ დამფუძნებლები საშუალო დონის პროდუქტის ირგვლივ ცდილობენ სტარტაპის გაზრდას, პროდუქტი სასწრაფოდ უნდა დახვეწონ – ,,პრობლემის თავიდან აცილებას ზრდისთვის საჭირო კაპიტალის მოზიდვით ნუ ეცდებით – ის კვლავ იარსებებს, [პროდუქტზე] უფრო მაღალ მოლოდინთან ერთად’’. ხოლო თუ დამფუძნებლებს სტარტაპზე მუშაობა ახალი დაწყებული აქვთ, მათ პირველ რიგში მომხმარებლებისთვის საყვარელი პროდუქტის შექმნაზე უნდა იზრუნონ. არ აქვს მნიშვნელობა, თუ რა დრო იქნება საჭირო ამ პროცესისთვის, რადგანაც მის გარეშე ვერცერთი მარკეტინგული ხრიკით უზრუნველყოფენ დამფუძნებლები სტარტაპის სტაბილურ ზრდას – ,,როდესაც მომხმარებლები აქტიურად ურჩევენ თქვენს პროდუქტს თავიანთ მეგობრებს, [სწორედ მაშინ გეცოდინებათ, რომ] სწორ ადგილას ხართ’’.
