მომხმარებლის გამოცდილების გამარტივების 4 სტრატეგია

თანამედროვე სამყაროში თითოეულ ადამიანს ამა თუ იმ პროდუქტის შეძენისას ასობით, ზოგ შემთხვევაში კი ათასობით ვარიანტი აქვს. ყოველდღე გვიწევს არჩევანის გაკეთება თუ რა წავიკითხოთ, სად წავიდეთ საყიდლებზე და კონკრეტულად რა ვიყიდოთ. ასეთი გადაწყვეტილებების მიღება ეკონომიკური განვითარების პარალელურად მუდმივად რთულდება.

რაც მთავარია, მარკეტოლოგები ამაზე არ ჩერდებიან და კიდევ უფრო მეტ ვერსიას, მეტ პროდუქტს, მეტ ფუნქციას, ინფორმაციას და ფასდაკლებებს გვთავაზობენ.

რა თქმა უნდა, ცუდი არაა ინვესტიცია ისეთ ინოვაციებში, რომლებიც პროდუქტებს და მომსახურებას მომხმარებლისთვის მეტად ღირებულს ხდიან. თუმცა, კვლევებით დასტურდება რომ რეალურად კლიენტებისთვის ყველაზე მნიშვნელოვანი სიმარტივეა.  ამის ნათელი მაგალითია ცნობილი საკონსულტაციო კომპანიის, Siegel+Gale-ის მიერ ჩატარებული კვლევა, რომელშიც 9 ქვეყნის წამყვანი ბრენდების 15 000 მომხმარებელზე მეტი მონაწილეობდა. შედეგად დადგინდა რომ ყველაზე მეტი ერთგული მომხმარებელი და წარმოების მაღალი მაჩვენებელი იმ კომპანიებს აქვთ, რომლებიც პროდუქტს თუ სერვისს ყველაზე მარტივად აწვდიან კლიენტებს.

სიმარტივე ისეთი ადვილი მისაღწევი სულაც არ არის, როგორც ეს ერთი შეხედვით ჩანს. ჩვენ შევაჯამეთ ამ საკითხებზე ჩატარებული კვლევების მასალები, შევისწავლეთ როგორც მომხმარებლების ასევე მარკეტოლოგების პოზიციები  და ამიტომაც, გთავაზობთ კლიენტის გამოცდილების გამარტივებისთვის საჭირო 4 ნაბიჯს.

1.განსაზღვრეთ და წარმოაჩინეთ რას ნიშნავს თქვენთვის სიმარტივე

პირველ რიგში განსაზღვრეთ რას ნიშნავს სიმარტივე თქვენი სტარტაპისთვის, რადგან ეს მრავალმხრივი კონცეფციაა. ამ გზას თუ აირჩევთ, მოგიწევთ რომ ხელახლა გაიაზროთ პროდუქტის განვითარების გეგმა, გაყიდვები და მარკეტინგი მოარგოთ მინიმალისტურ მიდგომას, შეამციროთ პროდუქტის ფუნქციონალური დატვირთვა და შესაბამისად ფასიც, შეცვალოთ სარეკლამო კამპანიები და კიდევ ბევრი სხვა დეტალი. თითოეული სტარტაპი თავად წყვეტს რომელ მიმართულებაში იქნება სიმარტივე უფრო ხელსაყრელი, უნიკალური კონტექსტის და გარემოებების გათვალისწინებით.

როგორც კი გამოყოფთ მაღალპრიორიტეტულ მიმართულებებს, მნიშვნელოვანია რომ ამის ხაზგასმა მოხდეს ყველა დონეზე. ანუ, ახალი მიდგომა აისახოს კომპანიის ღირებულებებზე და პრინციპებზე. შემდგომ კი ეს გაითავისონ თანამშრომლებმა და დაიწყონ შესაბამისად მოქმედება.

სტარტაპის მისაღებში კედელზე დაწერილი ლამაზი ფრაზა არაფერს ნიშნავს, თუ მას მთელი გუნდი არ იზიარებს. მაგალითად Netflix-ში დანერგილია ასეთი სიმარტივეზე ორიენტირებული მიდგომა, რომელიც აქტიურადაა ჩართული ზოგად კორპორატიულ კულტურაში და კომპანიის მართვაშიც. ეს ნათლად აისახება თანამშრომელთა სამოტივაციო პოლიტიკაზეც.  Apple-იც ასევე უპირატესობას ანიჭებს სიმარტივეს.

თუ მკაფიოდ განსაზღვრავთ და წარმოაჩენთ თქვენი სტარტაპის რომელ მიმართულებებს უნდა შეეხოს გამარტივების პოლიტიკა და რა ფორმით, თანამშრომლებს გაუმარტივდებათ ახალი პრიორიტეტების შესაბამისად მოქმედება.

2.გაამარტივეთ მომხმარებლის გამოცდილება და არა მხოლოდ პროდუქტი

პროდუქტზე ფოკუსირება მნიშვნელოვანია, თუმცა ზუსტად ამდენადვეა საჭირო მომხმარებლის სრული გამოცდილების გაანალიზებაც. ეს ნიშნავს, რომ მარკეტინგის და გაყიდვების ისეთი სისტემა უნდა შექმნათ, რომლის გავლითაც გამარტივდება თქვენი პროდუქტის მოძებნა, ყიდვა და გამოყენება.

თუ გსურთ დარწმუნდეთ, რომ მომხმარებლის გამოცდილების გამარტივების სწორ გზაზე ხარ, დაუსვით საკუთარ თავს მომდევნო კითხვები:

– როგორ გავუადვილოთ მომხმარებლებს ჩვენი შეთავაზებების გაგება და შეფასება? შეგვიძლია უფრო ნაკლები პროდუქტით, ფუნქციებით ან შესაძლებლობებით მივაღწიოთ პრობლემების ანალოგიურად ეფექტურ გადაწყვეტას?

– როგორ შევქმნათ სამიზნე აუდიტორიაზე მორგებული მარკეტინგული კამპანიები, რომლებითაც მომხმარებლებს მათ ენაზე გავესაუბრებით? თანაც ისეთ დროს და ადგილას რაც მათთვის ყველაზე გამოსადეგი იქნება?

– როგორ გავხადოთ საფასო პოლიტიკა უფრო თანმიმდევრული და გამჭვირვალე? თუ ფასი დამოკიდებულია მომხმარებლის ერთგულებაზე, სეზონზე, შეძენის ადგილმდებარეობაზე ან დემოგრაფიულ მონაცემებზე, კომპანიის შემოსავალი იზრდება, თუმცა კლიენტებისთვის რთულდება პროცესები.

– როგორ მოვახერხოთ მაღაზიის შიდა განლაგების ან რეალიზაციის ტექნოლოგიების (მაგალითად ავტომატური რეკომენდაციების ფუნქცია რომელიც გთავაზობთ მსგავს პროდუქტებს, მობილურ გადახდებს და ა.შ.) ოპტიმიზაცია ისე რომ პროდუქტის ყიდვის გამოცდილება გამარტივდეს?

მომხმარებლის გამოცდილების გამარტივების უამრავი ხერხი არსებობს. არ აქვს მნიშვნელობა მსგავსი პროდუქტების ერთ შეთავაზებაში გაერთიანებას გადაწყვეტთ, თუ ინტერნეტ გადახდების მეთოდებს დანერგავთ. ნებისმიერი რამ, რაც მყიდველის გონებრივ დატვირთვას შეამცირებს, დაგეხმარებათ ბრენდის იმიჯის გაძლიერებაში.

3.გარეგნული სიმარტივის მისაღწევად, მზად იყავით შიდაორგანიზაციული სირთულეების შესახვედრად.

თუ თქვენი პრიორიტეტი მომხმარებლის გამოცდილების სიმარტივეა, გაითვალისწინეთ რომ რთულ შიდა პროცესებს ვერ გაექცევით. პროდუქტის გარდაქმნა საკმაოდ რთული პროცესია. მაგალითად, Google-ის საძიებო სისტემის დღევანდელი სახის მიღებას დასჭირდა ხანგრძლივი რუტინული პროცესები, ტექნოლოგიისა და დიზაინის მრავალჯერადი ცვლილებები. ამგვარი შედეგისთვის კომპანიამ გუნდმა უარით გაისტუმრა არაერთი დეველოპერი და მომხმარებელთა სურვილების ვრცელი სია.

უკიდურესად რთულია იმის გარკვევა თუ რეალურად რა სურთ  თქვენს მომხმარებლებს (იმის ნაცვლად რასაც ამბობენ რომ სურთ). ყველაზე სასარგებლო და სამიზნე სეგმენტზე მორგებული პროდუქტის შესაქმნელად, პირველ რიგში უნდა დაადგინოთ მომხმარებელს კონკრეტულად რა შედეგის მიღწევა უნდა. გაითვალისწინეთ, რომ ისინი თქვენს პროდუქტს არ გამოიყენებენ ზუსტად ისე როგორც ამას თქვენ გეგმავდით. ასეთ საკითხებზე კონცენტრირების ნაცვლად, უმჯობესია განსაზღვროთ კლიენტების ყველაზე მწვავე პრობლემები და უპასუხოთ მათ გამოწვევებს რაც შეიძლება მარტივი და ეფექტური პროდუქტით (ან ფუნქციებით).

მომხმარებლისთვის მარტივი გამოცდილების შექმნა, საცეკვაო ნომრის დადგმას ჰგავს. თუ მოცეკვავე საკმარისად მოემზადება, ის შეასრულებს თითოეულ მოძრაობას ისე თითქოს ეს ძალიან მარტივია. რეალურად კი ვერავინ გაიგებს რამდენად დიდი შრომა დგას ამ ყველაფრის უკან.

4.დაიმახსოვრეთ, რომ სიმარტივე ყოველთვის საუკეთესო გამოსავალი არ არის.

კვლევების უმრავლესობა ადასტურებს რომ მომხმარებელთა გამოცდილების ყველაზე მნიშვნელოვანი ასპექტი სწორედ სიმარტივეა, თუმცა გარკვეულ შემთხვევებში ამ მიდგომამ შესაძლოა სრულიად საწინააღმდეგო შედეგი მოგიტანოთ. მაგალითად, თუ გამოუცდელ ახალ კლიენტს ესაუბრებით მარტივი მარკეტინგის მეშვეობით, ეს მისთვის პროდუქტიულია. თუმცა, თუ ანალოგიურად ესაუბრებით გამოცდილ მომხმარებელს, მისთვის ეს შეიძლება დამამცირებელი და უსარგებლო იყოს. იგივე ეხება პროდუქტებსაც. ზოგ სიტუაციაში მომხმარებელს სჭირდება მარტივი პროდუქტი, რომელიც ერთ დავალებას კარგად უმკლავდება. სხვა შემთხვევებში კი ისეთ გადაწყვეტას ეძებს, რომელსაც მეტი პერსონალურად მასზე მორგებული ფუნქცია ექნება.

Apple-ის ზოგიერთი სტრატეგიული გადაწყვეტილებაც კი ეწინააღმდეგება კომპანიის ფუნდამენტურ ღირებულებას შეინარჩუნოს სიმარტივე. მიუხედავად იმისა რომ Apple მუდმივად ცდილობს შეამციროს პროდუქტების რაოდენობა, კომპანიამ მაინც დაუშვა  ახალი და ძველი ვერსიების ერთდროული თანაარსებობის პრეცენდენტი.

Netflix მაგალითად, ინარჩუნებს მარტივ საფასო პოლიტიკას, ხოლო მრავალფეროვანი პროდუქტების შეთავაზებები მაინც საკმაოდ კომპლექსურია.

რა თქმა უნდა, სიმარტივე საუკეთესო მიდგომაა, მაგრამ უნდა გვახსოვდეს, რომ არსებობს სტარტაპის ისეთი მიმართულებებიც, სადაც მცირედი სირთულეები აუმჯობესებს მომხმარებელთა გამოცდილებას.

საბოლოო ჯამში, მარტივი მომხმარებლის გამოცდილების შექმნა საკმაოდ რთული პროცესია. ყოველთვის არსებობს იმის ცდუნება, რომ აუდიტორიას დაუსრულებელი ფუნქციების ნაკრები და დიდი არჩევანი შესთავაზოთ. 10-დან 9 შემთხვევაში კი მომხმარებელი აირჩევს მარტივ ვარიანტს და არა „იდეალურს“.

თუ გამარტივების გზაზე გაითვალისწინებთ შიდაორგანიზაციული პროცესების სირთულეებს და დაიტოვებთ სივრცეს გამონაკლისებისთვის, ნამდვილად მოახერხებთ მომხმარებლის გამოცდილების გამარტივებას.