Impact Hub Tbilisi სტარტაპ პრე-აქსელერატორში განაცხადების მიღებას იწყებს

Impact Hub Tbilisi იწყებს განაცხადების მიღებას სტარტაპ პრე-აქსელერატორში, რომელიც თიბისის პროგრამა „სტარტაპერის“ მხარდაჭერით ხორციელდება და მიზნად ადგილობრივი ტექნოლოგიური სტარტაპების განვითარებას ისახავს.

2022 წლის პრეაქსელერაციის პროგრამაზე განაცხადების მიღება დაწყებულია და გაგრძელდება 20 თებერვლამდე. განაცხადის შესავსებად გადადით ბმულზე. 

წელს პრე-აქსელერატორში 10–15 ადგილობრივი სტარტაპი ჩაერთვება, რომელთა შერჩევაც წინასწარი განაცხადების საფუძველზე მოხდება. მონაწილეობის მიღება შეუძლიათ ადრეულ საფეხურზე მყოფ სტარტაპებს, რომლებიც ქმნიან ან ეფუძნებიან ტექნოლოგიებს და მზად აქვთ პირველადი პროტოტიპი (MVP) ან ჩამოყალიბებული სამოქმედო გეგმა მის შესაქმნელად.

პრე-აქსელერატორი ტარდება ჰიბრიდულ ფორმატში (ონლაინ და ფიზიკური შეხვედრები), გრძელდება 12 კვირის განმავლობაში (მარტი 2022 – ივნისი 2022) და შედგება 5 ძირითადი კომპონენტისგან:

‣ თემატური სამუშაო სესიები (კვირაში 3 დღე, 2 საათი);
‣ ინდივიდუალური შეხვედრები მენტორთან (კვირაში 1 დღე, 1 საათი);
‣ ნეთვორქინგი – P2P შეხვედრები, გამოცდილების გაზიარება, მოწვეული სპიკერები, ყოველკვირეული Stand-up;
‣ იმფაქთ ჰაბის საერთო სამუშაო სივრცით სარგებლობა (მოთხოვნის შესაბამისად);
‣ დემო დღე – მონაწილე სტარტაპები წარდგებიან ინვესტორების წინაშე, სადაც საშუალება ექნებათ, მოიპოვონ ინვესტიცია სტარტაპის განვითარების და გაფართოების მიზნით;

მონაწილე სტარტაპები გაიღრმავებენ ცოდნას რამდენიმე მიმართულებით: პროდუქტის განვითარება და ვალიდაცია, მომხმარებლის სეგმენტაცია, ფასეული შეთავაზება, მარკეტინგი, ბრენდინგი, რეკლამა, გაყიდვები, Growth Marketing, MVP –  ტექნიკური პროდუქტის შექმნა, ბიზნესმოდელი და ფინანსები, Pitch Deck, დაფინანსების წყაროების მოძიება.

პრეაქსელერატორის დასრულების შემდეგ სტარტაპებს მზად ექნებათ: ბიზნესგეგმა/ბიზნესმოდელი, ფინანსური გეგმა, საკომუნიკაციო სტრატეგია, პროდუქტის პროტოტიპი ან მისი შესრულების ტექნიკური გეგმა, Pitch Deck, საინვესტიციო წინადადება დაფინანსების წყაროების მოსაძიებლად.

მნიშვნელოვანი თარიღები:

26 იანვარი – 20 თებერვალი – აპლიკაციების მიღება

7 თებერვალი – საინფორმაციო შეხვედრა (ონლაინ)

20 თებერვალი – 11 მარტი – მონაწილე სტარტაპების სელექცია (მეორე ტური)

14 მარტი – 1 ივნისი – პრეაქსელერაცია

2 ივნისი – დემო დღე

სტარტაპ პრე-აქსელერატორი 2021 წელს დაფუძნდა Impact Hub Tbilisi-ის საინიციატივო გუნდის მიერ:

◦ ელენე ჟვანია და ქეთევან ებანოიძე – Impact Hub Tbilisi-ის თანადამფუძნებლები
◦ ნინუცა ნანიტაშვილი – DevRel პროგრამის მენეჯერი Google-ისთვის (EPAM)
◦ მირიან ხომერიკი – ტექნიკური პროექტების მენეჯერი, Clientela
◦ ვასილ ჩუბინიძე – „ჟუჟუნა“ ღვინოს თანადამფუძნებელი, მარკეტერი

გუნდმა სპეციალური გადამზადების კურსი გაიარა წამყვან საერთაშორისო აქსელერაციის პროგრამაში და მიღებულ გამოცდილებაზე დაყრდნობით ჩამოაყალიბა ლოკალური პრე-აქსელერაციის პროგრამა, რომელიც ადგილობრივი სტარტაპ ეკოსისტემის გამოწვევებს პასუხობს. პირველი ნაკადის დემო დღე 2021 წლის ივნისში გაიმართა, პროგრამაში მონაწილე სტარტაპებმა საერთო ჯამში 500.000 ლარის ინვესტიცია/გრანტი მოიპოვეს.

მეტი ინფორმაცია პროგრამის შესახებ იხილეთ შემდეგ ბმულზე.