კარიერულ რჩევას ხომ არ ისურვებდით? – როი ბაჰატი
,,სად ხედავთ თქვენს თავს 5 წელიწადში?’’ – ეს, ალბათ, ის კითხვაა, რომელიც ადამიანების უდიდეს ნაწილს მიუღია და რომელზე პასუხიც, შესაძლოა, არ ჰქონია. თუმცა, ეს არ არის გასაკვირი – საკუთარი რამდენიმეწლიანი მომავლის ცხადად წარმოდგენა არც ისე მარტივია. ამგვარი გადაწყვეტილების მიღებამდე კი, ადამიანებს გარკვეულ საკითხებზე დაფიქრება გვჭირდება. სწორედ ამიტომ, ამერიკული ვენჩურული კაპიტალის ფირმის, Bloomberg Beta-ს დამფუძნებელი როი ბაჰატი გვიზიარებს რამდენიმე შეკითხვას, რომლებიც მას კონკრეტული ორიენტირის აღებაში ეხმარება.
შეკითხვა 1
იცით თუ არა, რა გსურთ ცხოვრების შემდეგი ეტაპიდან პროფესიული თვალსაზრისით? გინდათ, რაიმეს პირველად გაკეთების გამოცდილება მიიღოთ; გაარკვიოთ, არის თუ არა გარკვეული პროფესია თქვენთვის შესაფერისი თუ დაამტკიცოთ, რომ რაიმე კონკრეტული უნარი გაქვთ?, – გვიზიარებს პირველ შეკითხვას ბაჰატი.
შეკითხვა 2
მისი თქმით, მეორე საკითხი, რომელზეც უნდა დავფიქრდეთ არის გარკვეული ტიპის შეზღუდვები.
,,გჭირდებათ თუ არა კონკრეტულ ადგილას ცხოვრება? გარკვეული თანხის შოვნა?… მუშაობა ისეთ ადგილას, რომელსაც კონკრეტული კულტურა გააჩნია?’’, – ამბობს ბაჰატი და დასძენს, რომ ის ყოველთვის სვამს ერთ უტაქტო შეკითხვას – ,,რა რაოდენობის თანხის შოვნა გჭირდებათ იმისთვის, რომ ცხოვრება ნორმალურად წარმართოთ?’’.
შეკითხვა 3
,,რამხელა და რა ტიპის რისკზე წასასვლელად ხართ მზად?’’, – კიდევ ერთ შეკითხვას გამოყოფს როი და დასძენს, რომ მაგალითად, ზოგს ადარდებს მუშაობა სტარტაპში, რომელიც შესაძლოა ბიზნესიდან გაქრეს.
შეკითხვა 4
,,რა გააკეთეთ იდეების გენერირებისთვის იმის შესახებ, თუ რა შეიძლება გააკეთოთ შემდეგში?’’, – გვეკითხება ბაჰატი და აღნიშნავს, რომ შეგვიძლია გამოვიყენოთ ისეთი ინსტრუმენტები, როგორებიცაა LinkedIn და Crunchbase, რათა შევადგინოთ ჩვენთვის საინტერესო კომპანიების, ინდუსტრიების, ადამიანების ან პოზიციების სია.
შეკითხვა 5
გაქვთ რაიმე კონკრეტული მიზანი, რომლისკენაც ილტვით? მაგალითად, გსურთ Fed-ის ხელმძღვანელი იყოთ; ან აღმასრულებელი დირექტორი კომპანიისა, რომელიც კონკრეტულ საქმიანობას ეწევა; ან სამ წელიწადში პენსიაზე გახვიდეთ, – გამოყოფს ბოლო, თუმცა სხვებზე არანაკლებ მნიშვნელოვან საკითხს როი.
