ქართული სტარტაპები: Profy

პანდემიის გავრცელებამ მრავალი სფეროს ზრდა შეაჩერა. მძიმე ვითარების მიუხედავად,  ზოგიერთი მიმართულება, ამ შემთხვევაში კი საყოფაცხოვრებო ინდუსტრია, განვითარებას კვლავ განაგრძობდა.

Profy, რომელიც მომხმარებელს პროფესიონალი ხელოსნის, დიასახლისისა და IT მომსახურებას სთავაზობს, ქართულ ბიზნესსივრცეში არც ისე დიდი ხნის წინ და თანაც, არც ისე ხელსაყრელ დროს გამოჩნდა, თუმცა წარმატებას მალევე მიაღწია.

მე კი ბევრი რომ არ გავაგრძელო, კომპანიის ისტორიის შესახებ უფრო ვრცლად მისი გენერალური მენეჯერი, ირაკლი ზანთარაია მოგიყვება.

Profy-ის შექმნა

,,2018 წელს ძალიან საინტერესო ადამიანი, ‘’მისტერმასტერის’’ დირექტორი ბუბა სოსელია გავიცანი. ამ კომპანიის ფორმულიდან გამომდინარე (ერთგვარი ტრადიციული ბიზნესმოდელია) გაჩნდა ასეთი აზრი, რომ უშუალოდ ამ საყოფაცხოვრებო ინდუსტრიის გაციფრულება იყო შესაძლებელი. რეალურად, ბაზარზეც დიდი მოთხოვნა იყო’’, – გვიყვება ირაკლი და თანაც აღნიშნავს, რომ ამ საკითხით თავადაც იყო დაინტერესებული, შესაბამისად, ინდუსტრიაში 10-წლიანი გამოცდილების მქონე ბუბასგან ამ ინფორმაციის მიღებისას, ფაქტობრივად, ვალიდაციის ეტაპიც გაიარა – ,,MVP-იც შეიქმნა და ერთი სიტყვით, შევუბერეთ’’.

მართალია ცოდნის გარკვეული ბაზა უკვე ჰქონდათ, თუმცა, პირველ რიგში, დრო მაინც ბაზრის სიღრმისეულად შესწავლას დაუთმეს – ,,ვადგენდით, როგორ დაგვეკონვერტინებინა ჩვენი ცოდნა და გამოცდილება ისეთ პროდუქტში, რომელიც ბაზარზე ეკონომიკურ შესაძლებლობას შექმნიდა; ასევე, მომსახურების მიწოდების მხარესთვის რა იქნებოდა საინტერესო და რა გამოწვევები ჰქონდათ მაშინ უშუალოდ ხელოსნებს ბაზარზე, სად ჰქონდათ ჩავარდნები და ჩვენ რისი შეთავაზება შეგვეძლო მათთვის. მეორე მხრივ, მოთხოვნის მხარეს რომ გადავიდეთ – სად და რა პრობლემას აწყდებოდა მომხმარებელი’’.

ამ ყველაფრის დეტალურად შესწავლისა და განხილვის შემდეგ, უკვე შესრულებით ნაწილზე, პროდუქტის გაციფრულებაზე გადავიდნენ – ,,წინადადების მოთხოვნისა (RFP) და ტექნიკური დოკუმენტაციის გაწერა დავიწყეთ, რომ სახე მიგვეცა, როგორი უნდა ყოფილიყო პროდუქტი, როგორ ეფუნქციონირა და  რა უნდა შეეთავაზებინა როგორც მომხმარებლის, ასევე სერვისის მიმწოდებლისთვის’’.

მართალია ბევრი რამ გათვალეს; გაითვალისწინეს, რომ ბაზარზე არსებულ სტანდარტზე  უფრო მაღალი უნდა შეეთავაზებინათ მომხმარებლისთვის; აღწერეს; შეფუთეს, თუმცა, უშუალოდ პლატფორმის შექმნის ეტაპზე მისულები პრობლემის წინაშე აღმოჩნდნენ. მათ ტექნიკური გამოცდილება და განათლება არ ჰქონიათ, შესაბამისად, ეძებდნენ კომპანიას, რომელიც ამ სამუშაოს შეასრულებდა – ,,სამწუხაროდ, საქართველოში, რამდენიმე პარამეტრიდან გამომდინარე, შესაბამისი კომპანია ვერ ვიპოვეთ. პირველი, ფინანსური მიზეზი იყო, ხოლო მეორე – ჩვენი მოთხოვნა. რადგანაც იდეა, პროდუქტის აღწერა უკვე გვქონდა და ამის ტექნიკურად შესრულება გვჭირდებოდა, გვსურდა მრავალმხრივი კომპანია, რომელიც ბევრი მიმართულებით მოგვემსახურებოდა. ამ კონკრეტულ მონაცემებში ბელარუსიაში უკეთესი შეთავაზება მივიღეთ’’.

სერვისის მიმწოდებლებთან კომუნიკაცია და ხარისხის კონტროლი

როგორც ირაკლი აღნიშნავს, Profy-ისთვის ყველაზე მნიშვნელოვანი ყოველთვის ხარისხია, რაზეც კომპრომისებს არასდროს აკეთებენ. მისი უზრუნველყოფისთვის კი, სანამ სერვისის მიმწოდებელი პლატფორმაზე მოხვდება, კომპანიაში რამდენიმეეტაპიან გასაუბრებას გადის. პირველი საფეხური ასე გამოიყურება – ,,რაღაც მცირე ბარიერებია – ხელოსანს ბანკში უნდა ჰქონდეს ანგარიში, ასევე სმარტფონს ფლობდეს, რომელშიც მობილური ინტერნეტის ჩართვა-გამორთვა იცის. თუ ამ პარამეტრებს აკმაყოფილებს, შემდეგ ეტაპზე გადადის’’. მეორე საფეხურთან დაკავშირებით, ირაკლი იხსენებს, რომ თავდაპირველად ერთგვარი ლაბორატორია ჰქონდათ მოწყობილი, რომელშიც გათბობის ქვაბები, ონკანები და გაზქურები ჰქონდათ – ,,ოსტატების დიდი ნაწილი 50+ ასაკის იყო, რომელთაც ვერბალურად უჭირდათ იმის ახსნა, თუ რა როგორ უნდა გაკეთდეს, ამას მხოლოდ ორი სიტყვით ამბობდნენ. ამ დროს, თუ ჩვენს საოპერაციო მენეჯერს (ეკატერინე ზედელაშვილს) რაიმეში ეჭვი ეპარებოდა, ლაბორატორიაში ტესტირებას ვუტარებდით. მაგალითად, გათბობის ქვაბის შესახებ პრობლემას ვეუბნებოდით და შემდეგ ნაბიჯ-ნაბიჯ ვიწედით თუ რას აკეთებდა, რა სტანდარტები ჰქონდა’’. ამ საფეხურის წარმატებით გავლის შემდეგ, ოსტატი უშუალოდ აპლიკაციის მოხმარების პრინციპებს სწავლობს  – კალენდარს ავსებს, კონკრეტულ დროებს უთითებს და პლატფორმის სიაში ხვდება – ,,ამის მერე მან 1 კვირის განმავლობაში ნასამართლეობისა და ნარკოლოგიური ცნობები უნდა მოიტანოს, რათა მისი პროფილი საბოლოოდ გააქტიურდეს. აღნიშნული დოკუმენტები ჩვენთვის ძალიან მნიშვნელოვანია და  გარკვეული რისკების დელეგირებისთვის ვიყენებთ. ოსტატი უცხო ადამიანის სახლში შედის და მომხმარებელს ამით უსაფრთხოების დამატებით გარანტიას ვაძლევთ’’

ხარისხის კონტროლისა და შენარჩუნებისთვის, კომპანია უკუკავშირს დიდ მნიშვნელობას ანიჭებს – ,,ხშირად ვაწყობთ შეხვედრებს და უშუალოდ სერვისის მიმწოდებლებს ვესაუბრებით, რადგან ინდუსტრიის შიგნით რა ხდება ყველაზე კარგად მათ იციან. მომხმარებელს რაც შეეხება, მათთანაც ბევრს ვსაუბრობთ. პირველი გამოძახების მერე მეილზე ეგზავნება კითხვარი. ვურეკავთ კიდეც, არ არსებობს მომხმარებელი, რომელთანაც არ დაგვირეკავს. ყველა მხრიდან შეგროვებული უკუკავშირის შემდეგ კი ვაანალიზებთ მას და ვცდილობთ დავადგინოთ, რა გამოწვევები გვაქვს და რა არის გამოსასწორებელი’’.

პირველი ნაბიჯები ინდუსტრიაში – დაშვებული შეცდომები და უკუკავშირი

,,თავდაპირველად საქართველოს ელექტრონულ სივრცეში არსებული ყველა სახის ინფორმაცია მოვიძიეთ ხელოსნებზე. კომპანიების შემთხვევაში, ვიძახებდით, რაიმეს შევაკეთებინებდით და შემდეგ ვეკითხებოდით, როგორ ან რა პრინციპით მუშაობს, როგორი ანაზღაურება ჰქონდათ და ა.შ.’’ – ამ ინფორმაციის საფუძველზე კი, ოსტატებისთვის წარსადგენი შეთავაზება შეკრეს. მართალია, თავიდან ძალიან გაუჭირდათ ადამიანების ოფისამდე მიყვანა, თუმცა, დღეისთვის პლატფორმაზე 166 აქტიური ოსტატი მუშაობს და 30 000-ზე მეტ აქტიურ მომხმარებელს ემსახურება.

დაშვებულ შეცდომებზე საუბრისას, ირაკლი მომხმარებელთან კომუნიკაციის საკითხს იხსენებს – ,,თავდაპირველად, მათთვის ყველაზე პრობლემური ფასები იყო. ჩვენ P1 და P2 პრინციპით ვმუშაობთ – P1 30-40 ლარია, ხოლო P2 – 10. ეს რომ ავხსნათ, მაგალითად ოსტატი ონკანის შესაკეთებლად მიდის – მას ტრანსპორტირებისა და ადგილზე ყოფნის დრო, ასევე საწვავის თანხა ეხარჯება – ამ მომსახურების ღირებულება არის 40 ლარი. თუმცა, თუ ადამიანს 2 ონკანის შეკეთება სურს, ის არა 80 ლარს, არამედ 50-ს გადაიხდის, რადგანაც სერვისის მიმწოდებელი უკვე ადგილზეა.  სწორედ ამ ნაწილში არ გვქონდა მომხმარებელთან კომუნიკაცია – თუ მათ რამდენიმე ნივთის შეკეთება სურდათ, პლატფორმაზე რაოდენობას არ უთითებდნენ; ერთ ცალს ირჩევდნენ; ფასს ხედავდნენ; ავტომატურად ამრავლებდნენ ორზე და ფიქრობდნენ, რომ ძვირია. ამის გამო, ბევრი ადრეული მიმდევარი (early adopter) დავკარგეთ. რეალურად, დარეგისტრირებული ადამიანებისგან, რომლებიც რაღაც ეტაპამდე მიდიოდნენ და შემდეგ აღარ იძახებდნენ ოსტატს, უკუკავშირს ვიღებდით, თუმცა, ვერ ვხვდებოდით, რატომ იყო ძვირი’’.

ფასწარმოქმნა და ოსტატების ანაზღაურება

მომსახურების ღირებულებაზე რომ გავაგრძელოთ საუბარი, თავდაპირველად Profy საბაზრო ღირებულებას ყოველდღიურად ამონიტორინგებდა, ალაგებდა, საშუალო შეწონილ ფასს იღებდა და ასე ადგენდა კონკრეტულ მონაკვეთში, კონკრეტული სერვისის ფასს. ,,ჩვენი ფასწარმოქმნაც აქედან გამომდინარე იყო. ოსტატს ფასების დიაპაზონს ვაძლევდით (დღემდე ასეა) – ანუ, კონკრეტულ მომსახურებაზე მაქსიმალური (მაგალითად, ონკანის შეკეთებაზე 45 ლარზე მეტს ვერ მიუთითებს) და მინიმალური ფასები (რათა დემპინგი ავიცილოთ), ხოლო მათ შორის დაბალი ამლიტუდა (ნებისმიერ სერვისზე დაახლოებით 25%) გვაქვს. ამას პირველ რიგში თავისუფალი ბაზრის პრინციპისთვის ვაკეთებთ – ოსტატებს ღირებულების მართვა შეუძლიათ და ხვდებიან, რომ საწყის ეტაპზე დაბალი ფასების მითითება და შეკვეთების დაგროვება, ხოლო TOP-ებში გადასვლის შემდეგ – ღირებულების აწევა ურჩევნიათ. მეორე მხრივ კი, ბაზარზე სერვისს უფრო ხელმისაწვდომს ვხდით და ხარისხსაც მსგავსს ვიჭერთ – ონკანის შესაკეთებლად ხელოსნის 30 ან 45 ლარად გამოძახება შეგიძლია, თუმცა, რომელს აირჩევ მნიშვნელობა არ აქვს, რადგანაც ნებისმიერ შემთხვევაში იმავე ხარისხსა და სტანდარტს მიიღებ’’.

როგორც ირაკლი აღნიშნავს, ოსტატების ანაზღაურებაზე საუბრისას, ორი რამ არის მკაფიოდ გასაყოფი. ადამიანები, რომლებიც ამას სრულგანაკვეთიან სამუშაოდ აღიქვამენ, კვირაში მინიმუმ 5 დღე, ხოლო ყოველდღიურად მინიმუმ 8 საათის განმავლობაში არიან ხელმისაწვდომნი, 3 000 ლარზე მეტს გამოიმუშავებენ (Profy-ის საკომისიოს გამოკლებით). ხოლო იმ ხელოსნების შემოსავალი, რომლებიც ნახევარ განაკვეთზე, ანუ კვირაში დაახლოებით 3 დღე მუშაობენ, 1 000- 1 800 ლარს შეადგენს. ,,ხელოსნების გამომუშავებული თანხა ჩემთვის ერთერთი მნიშნელოვანი მეტრიკაა. პროდუქტს ისინი ყიდიან, ხოლო მე იმაზე ვზრუნავ, რომ მეტი შემოსავალი მიიღონ და ჩემთან თანამშრომლობით კმაყოფილები იყვნენ’’

ხელოსნის ინტერფეისი

პირველ ეტაპზე, როდესაც ოსტატი პლატფორმაზე რეგისტრირდება, მიმართულებას ირჩევს – უთითებს სანტექნიკოსია, ელექტრიკოსი, უნივერსალური თუ ა.შ. შემდეგ ავსებს კუთვნილი იარაღების სიას და უშუალოდ იმ სერვისებს, რომელთაც ასრულებს (მაგალითად, ტექნიკის ხელოსანი – მაცივარს).  ,,აპლიკაციაში ყველა ინსტრუმენტის სია გვაქვს, რომელიც არსებულ მომსახურებებთან არის კორელაციაში. შესაბამისად, როდესაც ხელოსანი კუთვნილ იარაღებს მიუთითებს, პლატფორმაზე მხოლოდ იმ მომსახურების არჩევას შეძლებს, რომლის შესრულებასაც რეალურად შეძლებს. ეს ერთერთი მექანიზმია ჩვენთვის იმისა, რომ შეკვეთები არ გაუქმდეს’’, – აღნიშნავს ირაკლი.

ოსტატისთვის მომსახურების მიწოდების უფრო გამარტივებისთვის, როდესაც მომხმარებელს მაგალითად ჭაღის დაკიდება სურს, ის დამატებით კითხვებს სცემს პასუხს – თუნდაც ჭერის სიმაღლისა და ჭაღის წონის შესახებ. ,,შესაძლოა, მომხმარებლისთვის ამას დიდი მნიშვნელობა არ ჰქონდეს, მაგრამ ხელოსნისთვის სერვისულად ძალიან განსხვავდება. თუ ჭაღი 5 კილოგრამზე მეტია, შეიძლება, ვინმეს გაყოლება დასჭირდეს, რათა არ დაუვარდეს. თუ ჭერი მაღალია, კიბე დასჭირდება, რომელიც ყველა მათგანს არ აქვს. ანუ, კიბით და მის გარეშე მომხმარებელი ოსტატების განსხვავებულ სიას ხედავს’’.

ბაზარზე ჩაშვება, პანდემია და ზრდა

Profy ბაზარზე 2019 წლის ოქტომბრის ბოლოს ჩაუშვეს, რამდენიმე თვეში კი პანდემია დაიწყო და ქვეყანაში მრავალი შეზღუდვა ამოქმედდა – ,,საერთო ჯამში, დაახლოებით 6 თვეა რაც გადამბულად ვოპერირებთ. თუმცა, ამ პირობებშიც კი მკაფიოდ ვხედავთ, რომ საყოფაცხოვრებო მომსახურება ბაზარზე ძალიან მოთხოვნადია’’.

ირაკლი იხსენებს, რომ პირველი ლოქდაუნის დროს, როდესაც ტრანსპორტის მოძრაობა აიკრძალა, პატარა ჩავარდნა ჰქონდათ. თუმცა, გამოსავალი მალევე იპოვეს, რაც კომპანიის წარმატების ერთერთი განმაპირობებელი მიზეზი აღმოჩნდა – ,,ყველა ხელოსანს დავურეკეთ და ვკითხეთ, გააგრძელებდა თუ არა მუშაობას. შემდეგ, მომსახურების მიწოდება უბნებად დავყავით და ოსტატებმა თავიანთი საცხოვრებელი ტერიტორიები აირჩიეს. ეს პრაქტიკა, რეალურად, ჩვენს სამომავლო გეგმებშიც შედის – გვსურს, რომ მომსახურება 24 საათის განმავლობაში იყოს ხელმისაწვდომი და ოსტატის ლოდინის დრო 15 წუთამდე შემცირდეს. ამ მიდგომით, როდესაც ტრანსპორტი არ იყო, Profy გამოძახებებს უბნების მიხედვით ემსახურებოდა. მაშინ მომხმარებლებისგან ძალიან კარგი უკუკავშირი მივიღეთ, შემდეგ კი ზეპირსიტყვიერად გავრცელდა ჩვენ შესახებ ინფორმაცია და პანდემიის მძიმე პერიოდებშიც კი, ზრდა გვქონდა. მართალია, ეს 200-400% არ იყო, თუმცა მაინც ვიზრდებოდით. კორონავირუსი რომ არ გავრცელებულიყო, ახლა ეს მაჩვენებელი ბევრად მეტი გვექნებოდა. ერთი პერიოდი ვხედავდით კიდეც, რომ ოფიციალური ბრიფინგის დანიშვნის შემდეგ, გამოძახებები იკლებდა ხოლმე, ხალხს ეშინოდა. ჩვენ მაინც ყველა სტანდარტის დაცვით (პირბადე, ხელთათმანი) ვემსახურებით მათ’’.

ბოლო 5 თვის განმავლობაში არსებულ ზრდას რაც შეეხება, მისი მაჩვენებელი საშუალოდ 42%-ს შეადგენს – ,,მარტში და აპრილში საკმაოდ დიდი ზრდა გვქონდა. საკმაოდ კარგად მუშაობს დალაგების მიმართულებაც’’.

ახალი სერვისები და ბაზრის წილი

,,თავიდან რაღაც ვარაუდები გავაკეთეთ იმის შესახებ, თუ წელიწადში რამდენჯერ შეიძლება დაგჭირდეს ხელოსანი. ბოლო მონაცემებით (ამ წლის პირველი კვარტლის დახურვის შემდეგ) კი ვნახეთ, რომ ჩვენი პროგნოზი პესიმისტური იყო. რეალურად, ოსტატი სამჯერ უფრო ხშირად სჭირდებოდა მომხმარებელს, რაც ჩვენთვის ძალიან მაგარი აღმოჩენა იყო. თუმცა, სანამ შესაძლებლობა გაქვს, თუ არ განვითარდი და ბაზარზე არ გაიზარდე, მერე შეიძლება გვიანი იყოს. ამისთვის კი, თვეში ან თვენახევარში ერთი გამოძახება არ იყო საკმარისი. ამიტომ, ერთი მომხმარებელის მიერ გაკეთებული შეკვეთების რაოდენობა რომ გაგვეზარდა, დალაგების სერვისი დავამატეთ’’.

ამ მომსახურებაზე ოდნავ ვრცლად რომ ვისაუბროთ, პლატფორმაზე სახლი სივრცეებად არის დაყოფილი და მომხმარებელი კონკრეტულ ოთახს ირჩევს. ამასთან, არსებობს 2 საათიანი დიასახლისის სერვისი – ,,ამ შემთხვევაში, მომხმარებელი შეკვეთას კონკრეტულ საქმიანობაზე არ აკეთებს. ის უბრალოდ დროზეა მიბმული, რომელშიც ნებისმიერ სერვისს მიიღებს. ეს შეიძლება იყოს დაუთოვება, ჭურჭლის დარეცხვა ან სტუდიო ტიპის სახლის დალაგება. ეს მომსახურების მიმწოდებლისთვისაც საინტერესო შეთავაზებაა, რადგანაც უმეტესწილად, ასეთ საქმიანობებზე 2 საათი არ სჭირდებათ ხოლმე და იმავე ანაზღაურებას 30-40 წუთში იღებს’’.

მართალია, დალაგების სერვისმა კარგი უკუკავშირი მიიღო, თუმცა კომპანია აქაც მომხმარებელთან კომუნიკაციის პრობლემას წააწყდა – ,,მომსახურება ძვირი არ ღირდა, მაგალითად, გენერალური დალაგება ჩვენთან 3-ჯერ უფრო იაფი გამოდიოდა, მაგრამ მაინც ბევრი ამბობდა, რომ ძვირი იყო. რეალურად, სერვისის აღწერაში გვქონდა აცდენა. ეს პრობლემა ასე მოვაგვარეთ – გამოვყავით შემდეგი კატეგორიები გენერალური, სტანდარტული, საათობრივი და რემონტის შემდგომი დალაგება. სტანდარტულში ფასები დავწიეთ, მომხმარებელიც მიხვდა ყველაფერს და შედეგიც მალევე დავინახეთ. დღეს ყველაზე პოპულარული სტანდარტული დალაგებაა’’.

დღეისთვის Profy-ს  თბილისის მასშტაბით ბაზრის დაახლოებით 5-6% უჭირავს და მისი მიზანი ამ მაჩვენებლის 30-40%-ამდე გაზრდაა. ,,რეალურად, რაღაც შეზღუდვები მაინც არსებობს. პლატფორმით რომ ისარგებლო, უნდა გქონდეს სმარტფონი, ინტერნეტი, ანგარიში. თუმცა, ჩვენი გლობალური მიზანია ქართულ ბაზარზე ყველა კარგი სერვისპროვაიდერი ჩვენთან გაწევრიანდეს’’, – აღნიშნავს ირაკლი.

TBC ბიზნესდაჯილდოება

TBC ბიზნესდაჯილდოების რეკლამა ირაკლის Facebook-ზე შეხვდა. პლატფორმის ჩაშვებიდან სულ რაღაც 1-2 კვირა იყო გასული, დიდად იმედიც არ ჰქონდათ, თუმცა, მაინც სცადეს და ფინალშიც მოხვდნენ.

,,ამის შემდეგ, ისევ Facebook-ზე ერთი კომპანიის პრომო ვიდეო შემხვდა, ისინიც დაჯილდოების ფინალში იყვნენ. ვიფიქრე, რომ მსგავსი რამ ჩვენთვის ძალიან მომგებიანი იქნებოდა, რადგანაც TBC თავის არხებზე დებდა და დიდი Reach ჰქონდა. დავრეკე, თანაც არაერთხელ. მითხრეს, რომ ჩემთანაც აუცილებლად მოვიდოდნენ და გადამიღებდნენ. საბოლოოდ კი მივიღეთ ერთგვარი უფასო რეკლამა, რაც ჩვენს პლატფორმაზე პირდაპირ აისახა’’, – იხსენებს ირაკლი.

ფინალის დღეც მოვიდა და ირაკლი და ბუბა დაჯილდოების ცერემონიაზე წავიდნენ – ,,მაშინ სხვა კომპანიებთან ერთად ფინალში Phubber-იც იყო წარმოდგენილი, რომელიც ყველას ფავორიტი გახლდათ. მეც მეგონა, რომ ის მოიგებდა. გამარჯვეულის გამოცხადების მომენტში ბუბას ვესაუბრებოდი; ვცდილობდი, არ მენერვიულა და თავს ვიმშვიდებდი, რომ სხვა დროს დავბრუნდებოდი. უცებ, ბუბა წამოხტა და გაიქცა. მეც გავყევი და აღმოჩნდა, რომ ჩვენ გავიმარჯვეთ’’.

გამარჯვებულებს TBC-მ რამდენიმე საჩუქარი შესთავაზა, აქ კი ირაკლიმ თადარიგი დაიჭირა და საიმიჯო ვიდეორგოლი აირჩია – ,,დალაგების სერვისზე ვფიქრობდით მაგ პერიოდში. მომსახურება ჯერ არც კი გვქონდა დამატებული, უბრალოდ კატეგორიის სიმბოლო შევქმენით აპლიკაციაში და მასზე გადავიღეთ ვიდეო’’.

მიმდინარე გეგმები

Profy-ის მიმდინარე ლოკალური გეგმა პლატფორმაზე სარემონტო სამუშაოების მომსახურების დამატებაა – ,,ჩვენი საბოლოო მიზანია შევქმნათ საყოფაცხოვრებო სერვისების ეკოსისტემა, სადაც სახლთან დაკავშირებული ნებისმიერი საკითხის მოგვარება შეიძლება. ამ ეტაპზე კი ბაზარზე საკმაოდ მწვავედ დგას რემონტთან დაკავშირებული პრობლემები. ამიტომ, ჩვენი ახალი მომსახურება ტიხრის აშენებიდან დაწყებული კედლის შეღებვით დასრულებულ ყველაფერს მოიცავს. ამასთან, ვფიქრობთ აგარაკების მოვლის სერვისის დამატებაც, რომელიც ასევე საკმაოდ მოთხოვნადია’’.

საქართველოს გარეთ გეგმებს რაც შეეხება, კომპანიას უკვე სამ ქვეყანასთან აქვს მოლაპარაკებები – ,,რეალურად, საქართველოს ბაზარი ძალიან პატარაა. ამიტომ თავიდანვე გვქონდა მიზნად დასახული, რომ ეს პლატფორმა საერთაშორისოდ გვექცია. მოლაპარაკებები თითქმის ბოლოსკენ არის გასული და იმედია, პანდემიის გამო, წელს მინიმუმ 1 მათგანში მაინც მოვასწრებთ პროდუქტის ჩაშვებას’’.

რჩევა სტარტაპერებს

რჩევაზე საუბრისას ირაკლი ამბობს, რომ კარგი იდეები ხშირად ესმის და აქვე აღნიშნავს, რომ მხოლოდ იდეა არაფერია, მთავარი შესრულებაა – ,,დღეს ძალიან ბევრი საშუალება გვაქვს იმისთვის, რომ იდეის ვალიდაცია გავაკეთოთ. მე ყველა ადამიანს, ვისაც რაიმე იდეა აქვს,  ვურჩევ, ეს ხელსაწყოები და შესაძლებლობები გამოიყენონ. თუნდაც, Facebook-ზე გვერდი შექმნან და ხალხს რაიმე შესთავაზონ’’.

ბიზნესკონტექსტში კოგნიტური მიკერძოებები რომ დამაზიანებელია, მოდი, ეს ნაწილიც გადავიმეოროთ – ,,რეალურად, როცა რაღაცას აკეთებ, ფიქრობ, რომ იმუშავებს, მაგრამ ძირითადად ეს მიკერძოება არის ხოლმე. ჩემ ირგვლივ ბევრ ადამიანს ვხედავ, რომელიც თავის იდეაზე ამბობს, რომ ძალიან მაგარია და აუცილებლად იმუშავებს. ხოლო როცა ვეკითხები – რატომ პასუხად ვიღებ, რომ ის აუცილებლად გადაიხდიდა ამაში ფულს. ეს კი არაა საკმარისი, ჩვენ სოციუმში ვცხოვრობთ. 1 დღის განმავლობაში რომ დაჯდე, მინიმუმ 150 ადამიანს გამოკითხავ და გაიგებ, რამდენად უგვარებ მათ პრობლემას. თუ უგვარებ, ძალიან კარგია და ამას აუცილებლად მეორე კითხვაც მოჰყვება – ფულს თუ გადაიხდის მაგაში. ადამიანები ხშირად ამბობენ, რომ რაიმე მოსწონთ, თუმცა საქმე საქმეზე რომ მიდის, მასში ფულს არ იხდიან. ამიტომ, ჩემი რჩევა იქნება, ვალიდაციის ნაწილი მოაგვარო – რაღაც ფინანსები ჩადო და რაიმე ხელჩასაჭიდი მიიღო, რომ დრო უაზროდ არ დაკარგო და სხვა იდეაზე გადახვიდე’’.

თუმცა, საბოლოოდ ირაკლი აღნიშნავს, რომ ვალიდაციის ნაწილის წარმატებით გავლა არაა იმის გარანტია, რომ წარმატებულ პროდუქტს შექმნი. ამიტომ, თუ სამსახური გაქვს, ამის გამო არ უნდა მიატოვო – ,,ვალიდაცია ერთერთი მწვანე შუქია, რომლითაც შემდეგ ეტაპზე გადადიხარ. ყველაფერს თანმიმდევრულად უნდა მიჰყვე’’.