WhatsApp ახალ ფუნქციას ამატებს

WhatsApp ამიერიდან მის მომხმარებლებს საშუალებას მისცემს, საუბრის ისტორია Android-იდან iPhone-ზე გადაიტანონ. ამ სიახლის შესახებ Meta-ის აღმასრულებელმა დირექტორმა, მარკ ზაკერბერგმა Facebook-ის პოსტში განაცხადა. თუმცა, ფუნქციის ადრეული ნიშნები ბეტა რეჟიმში მომხმარებლებმა კარგა ხნის წინ შენიშნეს.

ეს განახლება WhatsApp-ს დაეხმარება, მოაგვაროს გრძელვადიანი პრობლემა – ადრე რთული იყო ჩატის ისტორიის გადატანა ორ მობილურ ოპერაციულ სისტემას შორის მაშინ, როცა ეს პროცესი ერთი iOS მოწყობილობიდან მეორეზე ან ერთი Android მოწყობილობიდან მეორეზე ძალიან მარტივად ხერხდებოდა.

აქვე გეტყვით, რომ ისტორიის გადატანის ფუნქცია მუშაობს მხოლოდ ახალ ან ქარხნულად გადატვირთულ iPhone-ებზე და იყენებს Apple-ის უკვე არსებულ Move to iOS აპლიკაციას Android-ისთვის (რომელიც დაგეხმარებათ კონტაქტების, კალენდრის ჩანაწერების, SMS შეტყობინებებისა და სხვა ინფორმაციის გადატანაში).

საჭიროა, რომ iPhone-ის სისტემის დაყენებისას აირჩიოთ „მონაცემების გადატანა Android-იდან“ და შემდეგ მიჰყვეთ Android აპლიკაციის ნაბიჯებს. როგორც კი iPhone-ის სისტემა სრულად დაყენდება, გახსენით WhatsApp და შედით იმავე ტელეფონის ნომრის გამოყენებით. თქვენი ადრე არსებული Android ჩატის ისტორია აუცილებლად გამოჩნდება.

ისტორიის გადატანისთვის საჭიროა, გქონდეთ Android 5 ან ახალი ვერსია Android მოწყობილობაზე და iOS 15.5 თქვენს iPhone-ზე.