სტარტაპების მიერ პიარის მიმართულებით დაშვებული შეცდომები

შესაძლოა სტარტაპს იდეის ჩამოყალიბების, განვითარებისა და წარმატების მიღწევის შთამბეჭდავი ისტორია ჰქონდეს. თუმცა, შესაბამისი პიარკამპანიის დაგეგმვის გარეშე, საზოგადოებაში საკმარისი ინტერესი ვერ აღძრას. სწორედ ხალხთა ფართო მასის დაინტერესებაზე ზრუნავენ პიარის მიმართულებით მომუშავე პროფესიონალები, რომელთაც ერთდროულად სტრატეგიული და კარგი მთხრობელი ადამიანის უნარ-ჩვევები აქვთ.

რა უნდა გაითვალისწინონ სტარტაპებმა პიარკამპანიის დაგეგმვისას და რა სახის შეცდომებს უშვებენ ისინი ყველაზე ხშირად? ამ საკითხებზე საკუთარი გამოცდილებიდან რჩევებს პიარისა და მარკეტინგის მიმართულებით მომუშავე კომპანიის, The Silver Telegram-ის დამფუძნებელი და აღმასრულებელი დირექტორი რონჯინი ჯოშუა გვიზიარებს.

პრესრელიზის არსისა და დანიშნულების არცოდნა – რონჯინის თქმით, ზოგმა ადამიანმა არ იცის, თუ რისთვის ან როდის გამოიყენოს პრესრელიზი და ვინ არის რელიზის სამიზნე ობიექტი. ეს ნაწილი ცხადი რომ გავხადოთ, იგი განმარტავს, რომ სტარტაპი რელიზს წერს როგორც ჟურნალისტებისთვის, ასევე ინდუსტრიისთვის და პრესრელიზში ხაზი უნდა გაესვას იმას, თუ რატომ არის სიახლე მედიაში გასაშუქებლად ან ინდუსტრიისთვის საინტერესო.

პიარკამპანიის შეუსაბამო დროს დაწყება – იმისათვის, რომ პიარკამპანია შედეგიანი იყოს, მისი დაგეგმვა სტარტაპმა ადრე უნდა დაიწყოს. მაგალითად, რონჯინი აღნიშნავს, რომ მთავარ ღონისძიებამდე რამდენიმე კვირით ადრე იწყებს სტარტაპებთან ერთად მუშაობას. ეს დრო მას საშუალებას აძლევს, რომ კომპანიების იდენტობა შეისწავლოს და ისეთი სტრატეგია შეიმუშაოს, რომელიც ბრენდს წარმატების მიღწევაში დაეხმარება. თუმცა, აუცილებელია იმის გათვალისწინება, რომ პიარკამპანია შესაბამის დროს უნდა დაიწყოს – მისი გვიან დაწყება, ფაქტობრივად, დროის დაკარგვას უტოლდება; ხოლო მისი ზედმეტად ადრე დაწყების შემთხვევაში, მედიამ შეიძლება მიიჩნიოს, რომ სტარტაპის ისტორია ჯერ საინტერესო არაა.

საკვანძო შეტყობინებების არგანსაზღვრა – რონჯინის რჩევით, ნებისმიერ პიარკამპანიაში სტარტაპმა მინიმუმ სამიდან ხუთამდე საკვანძო შეტყობინება უნდა გამოკვეთოს – ,,ამის წინასწარ ცოდნა არა მხოლოდ განსახილველი თემების იდენტიფიცირებაში დაგეხმარებათ, არამედ განცხადების მიზნების ჩამოყალიბებაშიც დაგეხმარებათ. შეიძლება ითქვას, რომ ეს საუკეთესო გზაა იმის დასადგენად, თუ როგორ გსურთ საკუთარი თავის პოზიციონირება’’.

პიარისთვის ბიუჯეტის არგამოყოფა – ,,მიკვირს, როდესაც ჩვენთან ისეთი სტარტაპები მოდიან, რომლებიც პიარში თანხის გადასახდელად მზად არ არიან. შეიძლება მასალების დაწერა ძალიან მარტივ საქმედ აღიქმებოდეს, თუმცა, სიტყვა ყველაზე ძლიერი ინსტრუმენტია’’, – ამბობს რონჯინი და აღნიშნავს, რომ შესაბამისი სიტყვების გამოყენებით როგორც წარმატების მიღწევა, ასევე წარუმატებლობის გამოწვევაც შესაძლებელია – ,,ცუდად და კარგად დაწერილი რელიზების შედარებისას, ეს მარტივი შესამჩნევია’’.

არასწორი მედიისთვის დამიზნება – ხშირად, სტარტაპები არ ატარებენ საკმარის კვლევას იმისათვის, რომ მათთვის შესაფერისი მედია შეარჩიონ. რონჯინის თქმით, ბევრი დამწყები ამბობს, რომ პიარის პროფესიონალია, თუმცა, რეალურად პიარის მიმართულებაში არსებული მნიშვნელოვანი ნიუანსები არ ესმით. მისი რჩევით, თანამშრომლობის დაწყებამდე, სტარტაპებმა უნდა შეისწავლონ მედიების მიერ შექმნილი სხვადასხვა ტიპის მასალა (რაც უკეთ წარმოდგენას შეუქმნის მათ რეალურ შესაძლებლობებზე) და შემდეგ მიიღონ გადაწყვეტილება.

შედეგებისთვის თვალყურის არდევნება – პიარკამპანიის დაგეგმვისას, სტარტაპებმა კონკრეტული მიზნები უნდა დაისახონ და მათ მიხედვით, ამოცანები დასახონ – ,,რამდენი სტატიის გამოქვეყნება გსურთ? რამდენ ადამიანს გინდათ, მიაღწიოთ? ვის გინდათ, მიაღწიოთ? რა ზომის ტრაფიკის მიღება გსურთ?’’.

გაშუქებისთვის თვალყურის არდევნება – თანამშრომლობის პროცესში სტარტაპები მედიას დროდადრო უნდა დაუკავშირდნენ, რათა გაარკვიონ, თუ რაზე მუშაობს ის და რაიმე სახის მხარდაჭერა ხომ არ სჭირდება.